BAGUIO CITY – Saan a nailaksid dagiti negosyante a Muslim iti nagbalin nga epekto ti agdama a pandemya gapu iti COVID-19 iti sektor ti panagnegosyo iti siudad ti Baguio.
Iti interview ti Bombo Radyo Baguio, dinakamat ni Atty. Raihanah Sarah Macarimpas, Regional Director ti National Commission on Muslim Filipinos-Northern Luzon a nasurok 80 percent kadagiti Muslim ditoy siudad ti Baguio ti maibilbilang nga small-time businessmen.
Kinunana nga idi naapektaran ti ekonomiya gapu iti pandemya ket adu met kadagitoy ti naawanan ti pamastrekan a nagresulta tapnu adu dagiti agawid iti ilida sadiay Mindanao.
Innayonna a dagiti met Muslim a nabati ditoy siudad ket dagiti addaanen ti pagtaengan ditoy ken dagiti annakda ket agad-adal ditoy.
Kagiddan iti daytoy, pinagyamanan ni Atty. Macarimpas dagiti lokal a gobyerno kadagiti lugar iti rehion Cordillera nga addaan ti Muslim Community gaputa kabayatan ti panagrikos ti komisyon ket naamuan ken nakitada ti suporta a naawat dagiti kailyanda.
Kangrunaan a pinagyamananna ti panakaited ti ayuda ken relief goods a halal certified kadagiti Muslim Communities.
Inyapelana met ti agtultuloy a panagtungpal dagiti Muslim Filipinos kadagiti amin a paglintegan kontra iti COVID-19 para iti pagimbagan ti amin.
