BAGUIO CITY – Naideklara ita ti munisipyo ti Kabayan, Benguet kas kaunaan iti North Luzon nga African Swine Fever (ASF) -free kalpasan nga inaprobaran ti Bureau of Animal Industry ken Department of Agriculture ti aplikasyon daytoy para iti nasao a deklarasyon.
Sigun kenni Dra. Mirriam Tiongan, provincial veterinary officer ti Benguet, pormalen nga inawat ti Kabayan ti sertipikasyon daytoy kas ASF-free babaen iti National Zoning and Movement Plan Against ASF a programa ti DA.
Kinunana a ti laeng Kabayan ti kakaisuna a munisipyo a nakadanon iti Red Zone agingga iti Pink Zone a zooning status agsipud ta awan ti nailistada a kaso ti ASF iti uneg ti sumagmamano a bulan.
Inlawlawag ni Dr. Tiongan a dimmalan iti umno a proseso ti panakabigbig ti Kabayan a pakairamanan ti inspeksion ken panakaisumitir dagiti kaskenan a dokumento.
Dinakamatna a sakbay a maideklara kas ASF-free area ti maysa a lugar ket rumbeng nga mangipasa pay dagitoy iti ASF Free declaration Form iti Provincial Veterinary Office.
Kalpasanna, dumalan pay daytoy iti tallo nga stage a pakairamanan ti cleaning ken disinfection iti uneg ti 30 nga aldaw, environmental swabbing kadagiti pagpupukan ti baboy.
Sumaruno ditoy ti sentinel stage a paka-obserbaran dagiti taraken a baboy ken maipasidong dagitoy iti nagduduma a test tapno maipanamnama a negatibo dagitoy iti sakit.
Sigun pay kenni Dr. Tiongan, dagiti munisipyo a maideklara kas ASF- free ket maipangpangruna kadagiti programa iti nasyonal a gobierno.
Kabayatanna, kinuna pay ti opisyal a kitkitaenda met ti posibilidad nga agaplikar kas ASF-free ti Atok, Tublay ken Bokod gaputa awan ti nailista a kaso ti ASF kadagiti nasao a munisipyo iti naglabas a 90 nga aldaw.
Maipalagip a tallo met a munisipyo iti Benguet ti awanan pay iti kaso ti ASF a pakairamanan ti Kapangan, Kibungan ken Bakun ngem iwanwanawan daytoy ti Department of Agriculture ken Benguet Provincial Veterinary Office. (with Bombo Janice Juanito)
