Nakasaganan dagiti kameng dagiti nagduduma a unit iti Baguio City Police Office para iti All Saints day ita nga aldaw.
Alas singko paylaeng ti agsapa ket addan a nakadeploy ken agsagsagana dagitoy iti Baguio City Public Cemetery nu sadino nagpatakderda kadagiti tents, nangikabilda ti barikada iti kalsada ken signages iti nagduduma a paset iti sementeryo.
Adda met nagsina a pagserrekan dagiti babbai ken lallaki iti sango ti gate ti sementeryo tapno masukimat pay nga umuna dagiti bag ken dadduma nga intugutda tapno maipasigurado nga awan dagiti iggem dagitoy a maipawil nga iserrek iti uneg ti sementeryo.
Kumpyansa met ni PMaj Allan Alog, Police Station 1 Commander a nakasagana dagiti kameng dagiti puli para ita nga aldaw ken kinuna nga umdas ti preparation nga inaramidda tapno maipasigurado ti kinatalged dagiti bumisita iti sementeryo ita nga aldaw
Naituding met a mangipatakder ti tents iti uneg ti sementeryo ti Philippine Red Cross ken dadduma a Health Units para iti medical assistance dagiti bumisita iti sementeryo.
