Inkalintegan ti Baguio City Police Office nga awan ti napasamak a panakadangran gapu iti stray bullet iti siudad ti Baguio kabayatan ti isasangbay iti baro a tawen kalpasan ti insayangkat dagitoy nga imbestigasyon.
Maipalagip nga immunan nga impakaammo ni Dr. Celia Flor Brillantes manipod iti City Health Services Office nga adda iti nailistada a kaso iti panakadangran gapu iti stray bullet iti siudad nu sadino, dimmaplis ti maatap a bala ti paltog iti makannawan a paset likodan ti biktima.
Nakapatang metten dagiti otoridad ti 32-anyos a biktima manipud San Luis Barangay a nangipakita iti sugat daytoy iti likodanna a maatap a gapu iti stray bullet.
Sigun iti asawa ti biktima, adda dagitoy iti ruar ti pagtaenganda nga agsagsagana para iti panakasindi dagiti firecracker idi nakarikna ti asawana iti panagsakit iti likodanna nu sadino, naduktalan a nagsagrap daytoy iti abrasion wenno gasgas.
Kasaruno dayta, nakasarak dagitoy iti bala iti aglawlawda rason a daytoy ti maitudtudo a rason iti panakadangran iti biktima.
Nupay kasta, saan nasarakan a bala ti ibilbilang dagiti otoridad a rason iti panakadangran iti biktima gapu ta nasarakan daytoy iti kaadayo a dua a metro manipod disso a nagpwestoan ti biktima idi nagsagrap iti panakadangran.
Malaksid iti dayta, addaanen iti deformities ti nasao a bala idi narekober daytoy.
Sigun pay kadagiti otoridad, imposible a makalusot ti bala kadagiti natatayag a pasdek iti aglawlaw ken nagsasaruno metlaeng ti panakasindi dagiti kwitis.
Gapu iti dayta, indeklara ti Baguio City Police Office a saan a gapu iti stray bullet ti panakadangran ti maysa nga indibidual iti siudad ti Baguio nu diket maysa a firecracker-related incident.//Bombo Mera Pacpacan
