BAGUIO CITY – Ngimmato iti 155.69% dagiti kaso ti dengue fever ditoy siudad ti Baguio.
Maibasar iti rekord ti City Epidemiology Surveillance Unit ti Baguio City Health Services Office, pakabuklan a 202 a kaso ti dengue fever ti nailista manipud Enero 1 agingga Hunyo 19 ita a tawen nga adayo a nangatngato no idilig iti 79 a kaso ti dengue fever a nailista iti kapada a panawen idi napalabas a tawen.
Naamuan a ti age range dagiti nakaptan ti dengue fever ket walo a bulan agingga iti 90-anyos, no sadino, 30% kadagitoy ti adda iti age groups a 10-14 ken 15-19 bayat a kaaduan wenno 52% ket babbai.
Naobserbaran ti panagngato ti kaso ti dengue fever idi Mayo agingga iti Hunyo.
Karaman kadagiti sintomas ti dengue fever ti gurigor a dumandanon iti 40°C a giddanan ti dua kadagiti sintomas a nakaro a panagsakit ti ulo, ut-ot iti likod ti mata, nakaro nga ut-ot iti lasag ken susuop, makabakbakwar, panagbakwar ken skin rash nga agpaut iti dua agingga pito nga aldaw.
Gapu iti daytoy, ibalbalakad manen da Mayor Benjamin Magalong ken City Health Officer Dr. Rowena Galpo ti panagridam dagiti umili ti siudad kontra iti nasao a sakit kagiddan ti panagannadda met manipud iti COVID-19.
Maiyap-apela manen ti panagsurot dagiti umili iti 4S Strategy iti Dengue Prevention and Control, partikular ti Search and Destroy Mosquito Breeding Places; Self –Protection Measures wenno ti panagaramat ti window screens, mosquito nets, wear protective clothing, use insect repellents; Seek Early Consultation ken Say No to Indiscriminate Fogging.
