Dumanonen iti 169 ti nailista a kaso ti human rabies manipud Enero aginnga idi Mayo, iti agdama a tawen, no sadino nangatngato daytoy no idi napalabas a tawen iti kapadana metlaeng a bulan.
Maibasar iti datos manipud iti Department of Health (DOH), nangatngato iti 13% ti kaso a nailista iti nasao a bulan.
Kaaduan kadagiti nakailista ket manipud Soccsksargen region iti Central Mindanao a dumanon iti dua pulo ket maysa, sarunuen ti Calabarzon ken Bicol Region nga addan iti agpada a sangapulo ket walo a kaso.
Kabayatanna, dagiti nailista a kaso ket gapu paylaeng iti gakat ti aso nga 156 wenno 92%, bayat a 10 wenno 6% met ti gakat ti pusa.
Gapu iti daytoy, nagballag ti Department of Health (DOH), iti publiko a nasken nga ipabakunada dagiti tarakenda nga aso ken pusa kontra iti rabies kasta met nga agpabakuna dagitoy apaman a nakagat dagitoy iti aniaman a dengwen.
