--Ads--
BAGUIO CITY – Nairekord ti kaunaan a kaso ti ipupusay gapu iti COVID-19 sadiay Mountain Province idi kalman.
Maibasar iti report, pimmusay ti lalaki a pasiente nga agtawen iti 71 manipud Chackong, Bontoc Ili, Bontoc, Mountain Province.
Addaan daytoy iti travel history ditoy Baguio City ken nagpataming iti maysa nga ospital ditoy siudad ngem nakaruar daytoy manipud pagagasan idi Nobiembre 25.
Malakasid iti pimmusay, nailista idi kalman ti innem a kabarbaro a kaso ti COVID-19 sadiay Mountain Province.
Iti agdama, dumanonen iti 56 ti pakabuklan a kaso ti COVID-19 sadiay Mountain Province, 42 ti naimbagan ken 14 dagiti aktibo a kaso.
