BAGUIO CITY – Indauluan ni Department of Agriculture (DA) Secretary Emmanuel Piñol ti kaunaan a Potato Harvest Festival a naisayangkat sadiay Bayoyo, Buguias, Benguet a paset ti aktibidad ti DA-Cordillera kas panakikaykaysada iti panakarambak ti maika-32 nga anibersaryo ti Cordillera Day.
Sigun iti DA-Cordillera, ti festival ket bunga ti kolaborasyon iti nagbaetanda iti maysa a dakkel a food and beverage company iti pagilian a nangrugi idi 2017 tapnu mapapintas ti potato industry ditoy rehiyon.
Indauluan ni Sec. Piñol ti umuna a panag-apit kadwana dagiti farmer cooperatives, local government units ti Buguias ken Mankayan, Benguet; Bauko, Mt. Province ken dagiti private partner institutions.
Naamuan a dagiti naapit ket bunga dagiti 81 metric tons a high quality potato seed tubers a naiwaras kadagiti benipisaryo a mannalon ti Benguet ken Mountain Province idi March 2019.
Nagtaud dagiti nasao a tubers ti patatas sadiay Prince Edward Island, Canada.
Sigun kenni Sec. Piñol, napateg unay kenkuana ti nasao nga aktibidad gaputa daytoy ti mangipakpakita no kasano karigat ti mangipatungpal iti reporma iti agrikultura.
Kiniddawna met ti panangipangato dagiti mannalon iti kasasaadda kas raw materials producer iti panagbalinda a processor wenno marketer ti bukodda a produkto.
Sigun met kenni Agot Balanoy, manager ti maysa kadagiti farmers cooperative a benipisaryo ti proyekto, napimpintas ti kalidad dagiti nasao a patatas a naapit ken addaan daytoy iti high market value.
Inkari pay ti DA ti agtultuloy a panagbalinda a dalan tapnu ad-adda pay a dumur-as ti biag dagiti mannalon iti pagilian. (with Bombo Charles Nikko Limon)
