Maal-allukoy ti publiko a makipaset iti kaunaan nga Immipugo Football Cup Tournament a maangay iti IFSU Lagawe Campus idiay Ifugao inton Hulyo 13 ken Hulyo 14 iti agdama a tawen.
Daytoy a tournament ket babaen iti panang-organisa ni Former World Boxing Council (WBC) Asian Feather ken World Boxing Organization (WBO) Oriental Featherweight Champion KJ Natuplag.
Iti panakiuman ti Bombo Radyo kenni Natuplag, ti nasao a torneo ket para iti panangital-ona iti ay-ayam a Football idiay Ifugao nangruna ket bassiten ti agay-ayam iti nasao nga sport.
Sigun kenkuana, daytoy a Football tournament ket addaan ti nagduduma a kategorya pakairamanan ti 8 years old (8U), 10 years old (10U), 12 years old (12U), 14 years old (14U), 16 years old (16U), 18 years old (18U), Men’s Open ken ti Women’s Open.
Kinuna ni Natuplag a nangrugi ti club daytoy iti Football idi tawen 2018 ken imbinglayna a sakbay a nagbalin a professional boxer ket ti umuna nga sportna idi kina-highschoolna ket ti Footbaall.
Impeksana pay a tarigagayna nga ipakaamo ti daduma nga sports kadagiti ubbing saan laeng a maipapan iti basketball ken tapno makatulong daytoy kadagiti ubbing a makita ti kinalaingda iti sport a Football.
Kabayatanna, panggep ni Natuplag kas maysa a boksingero nga agorganisa iti boxing tournament nu dumteng ti panawen a kompleto dagiti kagawaan para iti nasao nga ay-ayam.//Bombo Mera Pacpacan
