Kinondenar ti lead defense ni sigud a president Rodrigo Duterte ti panagkiddaw iti International Criminal Court (ICC) kadagiti kanayonan a testigo para iti kaso a crime against humanity ti sigud a presidente.
Sigun kenni Nicholas Kaufman,rumbeng nga agtalinaed a neutral ti international tribunal ken saanna nga inruar iti publiko ti website daytoy partikular ti microsite nga “ICC witness appeal” nga immuna a naiyuswat idi December 2024.
Babaen iti nasao a microsite ket makagun-od ti prosekyusyon iti impormasyon a mabalin a maaramat kas ebidensya iti kaso ni FPRRD a crime against humanity.
Karaman kadagiti mabalin a mangipaay iti impormasyon wenno agbalin a witness dagiti kameng iti Philippine National Police, Philippine Drug Enforcement Agency, National Bureau of Investigation, dagiti local government units, ken daduma pay nga ahensya iti sidong iti executive, legislative ken judicial branch iti gobyerno ti pagilian.
