BAGUIO CITY – Maigiddan ti aktibidad nga isayangkat ti Kilusang Mayo Uno iti maudi nga aldaw ti jeepney consolidation, April 30.
Iti panakiuman ti Bombo Radyo kenni Mike Cabangon, dadaulo ti Kilusang Mayo Uno-Cordillera, mammaminsan a maipatungpal ti aktibidad para ti panangilaban dagitoy iti kanayonan a sweldo, pagbiagan, karbengan dagiti mangmangged, kasta met ti panagtubngar dagitoy iti Public Utility Vehicle (PUV) Modernization Program ti gobyerno ken ti economic provision iti konstitusyon ti pagilian.
Mangrugi ti aktibidad iti alas otso ti agsapa nu sadino maangay ti caravan, motorcade dagiti jeepney, panagdadapun dagiti driver sadiay post office, ken panakaisayangkat ti programa sadiay Igorot Park.
Panggep ti nasao nga aktibidad nga ipaganetget ti agpayso a kasasaad dagiti mangmangged iti pagilian ken tubngaren ti saan pay a panakipaay ti kanayonan a sweldo.
Sigun kenni Cabangon, agtultuloy latta ti panangiyapelada iti panagbalin a Php750 ti sweldo tunggal aldaw manipod iti Php430 a tangdan dagiti mangmangged iti agdama.
Innayon ti opisyal a saan nga umanay ti barya laeng a maipapaay kas kanayinan a sweldo kadagiti mangmangged gapu ta saan a makakamat daytoy iti inflation ti pagilian.
Sigun kenni Cabangon, kaspangarigan adda ti maipaay a bassit a kanayonan a sweldo ket masapol nga agbalin nga immediate relief daytoy.
Gapu iti dayta, guyguyugoyen ti nasao nga opisyal dagiti mangmangged a makipaset iti nasao nga aktibidad tapno mariing ken maamiris ti gobyerno ti agdama a kasasaad dagitoy.//Bombo Rob Dominguez
