BAGUIO CITY – Iyap-apela manen ti ama ti Benguet ti panagtungpal dagiti umili kadagiti pagalagadan ken pammilin para iti selebrasyon ita nga Yuletide Season.
Sigun kenni Governor Melchor Diclas, maipawil latta dagiti panagu-urnong kas iti reunion ken saan a maipalubos ti panag-caroling ken panagpaputok bayat nga epektibo latta ti liquor ban.
Nupay kasta, inyunay-unayna a maipalubos met ti panagurnong kabayatan ti selebrasyon iti holiday dagiti laeng agkakapamilya.
Inlawlawagna nga amin dagitoy a pagalagadan ket para iti panakaipanamnama ti natalinaay ken natalged a panakarambak ti Paskua ken Baro a Tawen manipud iti panakaiwaras ti COVID-19.
Dinakamatna met a dagiti laeng napapateg a panagbiahe ti mapalubusan tapnu nainget a masurot dagiti health protocols a manglimlimitar iti garaw dagiti tattao.
Mangnamnama pay ni Gov. Diclas a mapalukayan dagiti pagalagadan ti probinsia kontra iti COVID-19 iti maikadua a lawas ti sumaruno a bulan ti Enero iti kanito a maobserbaran ti panagbaba ti kaso ti nasao a sakit iti Benguet.
Tarigagay pay ti provincial government a marikna ti tunggal umili ti Benguet ti ispiritu ti Paskua iti baet ti mapaspasaran ita a pandemya.
