Patien ni President Ferdinand “Bongbong” Marcos Jr. a nakemmeg ni Kingdom of Jesus Christ (KOJC) founder a ni Apollo Quiboloy, saan a simmuko.
Para kenni President Marcos, napilitan a nagparang ti nasao a pastor gaputa asidegen dagiti pannakabagi ti linteg iti compound ti Kingdom of Jesus Christ.
Impaganetget ti Presidente a napinget gamin dagiti kameng ti pulisia a nangtiliw iti KOJC founder.
Daytoy ket kinuna ti presidente kasaruno ti maaw-awatna a damag nu simmuko ni Quiboloy wenno nakemmeg daytoy.
Maibasar iti immun-una a report, simmuko ni Quiboloy iti Intelligence Service of the Armed Forces of the Philippines (ISAFP) iti agarup 5:30 p.m. iti Domingo.
Natiliw pay da Jackielyn Roy, Ingrid Canada, Crisente Canada, Syliva Cemañes, a kakadua ni Quiboloy.
Nailugan ni Quiboloy ken dagiti maipagarup a kakaduana manipud Davao idi alas 6:30 t.m. ken simmangpet iti Villamor Airbase iti Pasay City idi agarup 8:30 p.m.
Dagos met a naiturongda iti Camp Crame idiay Quezon City, simmangpetda idi agarup 9:10 p.m., ken naipasidong daytoy iti umno a proseso.
