BAGUIO CITY – Umap-apela ti Baguio City Police Office (BCPO) Station 9 iti kooperasion dagiti indibidual a nakakita iti napasamak a pannakakawtibo wenno pannaka-kidnap ti maysa a lalaki sadiay Purok 16, Irisan Baguio City tapno mabigbigen dagiti suspek.
Immunan a nasarakan ti bangkay ti biktima ken napungsay wenno naputed ti ulona.
Nasarakan daytoy sadiay Kilometer 20 Gulon, Ambassador, Tublay, Benguet ken nabigbig a ni Harjan Paycao Lagman, 25-anyos, driver ken residente ti Irisan, Baguio City.
Iti interview ti Bombo Radyo kenni PMaj. Eddie Bagto, station commander ti BCPO Station 9, kinunana nga awan ti rumbeng a pagbutngan dagiti nakakita iti nasao nga insidente ken masapul nga agtestigoda tapno maipaayan iti hustisya ti biktima.
Kinunana a maipatpatungpal ti naun-uneg nga imbestigasyon tapno maammuam ti motibo ti pannakawtibo ti biktima.
Innayonna nga awan met ti kriminal a rekord ti biktima kas maitunos iti listaan iti Justice Hall ti lokal a gobierno ti Baguio City.
Dinakamatna a manarimaan metlaeng ti pannakikoordinarda iti Philippine Drug Enforcement Agency (PDEA-Baguio) gapu iti maatap a koneksion ti biktima iti iligal a droga.
Kagiddan iti daytoy, impanamnama ni PMaj. Bagto nga aramiden ti pulisya ti amin a kabaelanda tapno mammuan ken matiliw ti suspek iti nasao a krimen.
