Ammuyu kadi nga adda ti maysa a tao a nagpammarang a ni Elon Musk wenno ti kabaknangan a tao iti sangalubungan a nagtakaw ti $250k iti biktimana?
Nakemmeg ti maysa a lalaki kalpasan a nagpammarang a ni Elon Musk ken tinakawna ti $250,000 wenno P14.7 million manipod iti maysa a babai a senior citizen idiay Bradenton, USA.
Ti suspek, nagpammarang pay kas Johnny Depp ken kas ni singer-songwriter a ni Lionel Richie.
Nabigbig ti suspek a ni Jeffrey Moynihan.
Maibasar iti imbestigasion, tawen 2023 idi naggayyem ni Moynihan ti biktima iti social media, agingga a nagbalin a regular ti komunikasionda iti tunggal maysa.
Gapu iti panagpammarangna kas ni Elon Musk, nakumbinsirna ti senior citizen nga ag-invest iti negosio.
Agingga a naalarma ti asawa ti biktima kalpasan a kinuna ti bangko kenkuana seknan iti dadakkel a transakion iti account dagitoy.
Ti asawa ti biktima ti nangireport iti pulisia.
Idi naipatungpal ti “interrogation”, impaganetget ni Moynihan a maysa metlaeng daytoy a biktima ken naaramat laeng daytoy para iti scam.
Nupay kasta, nakaala dagiti kameng ti pulisia ti ebidensia nga agpampammarang metlaeng ni Moynihan kas ni Hollywood actor a ni Johnny Depp ken ti singer-songwriter a ni Lionel Richie.
Saan pay a nalawag nu maaramat daytoy ti suspek iti scam.
Mapapati nga adda pay ti dadduma a kakadua ti suspek.
