BAGUIO CITY – Nakemmeg ti maysa a vendor gapu iti panagimetna ti iligal a droga sadiay Balili, La Trinidad, Benguet idi kalman.
Nabigbig daytoy a ni Ryan Viray Agbuya, agtawen iti 35, tubo ti Baguio City ken residente ti Pico, La Trinidad Benguet.
Maibasar iti report, nagresponde dagiti otoridad kalpasana naiyuman kadakuada ti saan a panagbayad ti suspek iti plete daytoy.
Kabayatan ti panakisaritada, inkalintegan ti suspek nga awan ti pagplete-na agingga nga aksidente a nairuarna ken natnag ti maysa a pakete a naglaon iti maatap a shabu manipod iti bulsa daytoy.
Dagus a natiliw ti suspek ken nakumpiskar manipod kenkuana ti iligal a droga nga agdagsen iti .20 grams ken aggatad iti P1,360.
Manamnama a mapilaan daytoy iti kaso a panaglabsing iti RA 9165 wenno ti Comprehensive Dangerous Drugs Act of 2002.
