BAGUIO CITY – Sumangsango ita iti kaso nga illegal possession and use of false treasury or bank notes and other instruments of credit ti maysa a lalaki kalpasan a nagaramat iti bugos wenno peke a kwarta sadiay Lake Drive, Burnham Park, Baguio City.
Nabigbig daytoy a ni Osman Daliatay, 33-anyos ken tubo ti Cotabato City.
Maibasar iti blotter ti pulisya, nagturong ti suspek iti pagtagilakuan ni Edna Bagtang tapnu aggatang ti bonnet.
Naamuan nga idi inyawat ti suspek ti sangaribo a pisos a kwarta iti nasao a vendor ket inawat ken sinilawanna ti nasaoi a kwarta.
Nupay kasta, ditoy metten a killaat a timmaray ti suspek.
Kinamat met daytoy ti vendor kagiddan ti panagpaarayatna kadagiti naka-duty sadiay a pulis.
Nagresulta daytoy iti panakakemmeg ti suspek.
Nakomendaran met ni Bagtang gapu iti kinaridamna a mangsukimat iti kwarta nga iyaw-awat dagiti gumatgatang kenkuana.
