BAGUIO CITY – Nakemmeg ti maysa a napeklan nga scammer a nakabiktimaan dagiti adu a tattao, pakairamanan dagiti taga-Baguio City.
Nabigbig daytoy a ni Jerico Crisostomo, 48-anyos, naasawaan ken residente ti Mahugani, Cabuyao, Laguna.
Nakemmeg daytoy babaen iti bileg ti warrant of arrest nga impaulog ni Presiding Judge Maria Ligaya Itliong-Rivera ti Regional Trial Court, First Judicial Region – Branch 5, Baguio City gapu iti kaso a syndicated estafa.
Awan ti nairekomendar a piyansa ni Crisostomo a nakemmeg sadiay Barangay Uno, Crossing, Calamba, Laguna.
Naamuan a ni Crisostomo ket miembro ti Alvin Mallari Criminal Gang a karaman iti investment frauds wenno swindling activities nga addaan operasyon iti entero a pagilian.
Naamuan pay a dumanon iti pakabuklan a P6-M ti naitaray ti nasao nga indibidual manipud kadagiti nagbalin a biktimana.
