BAGUIO CITY- Dumanon iti agarup lima nga accommodation establishments iti siudad ti Baguio ti namulta gapu iti nagduduma a panaglabsingda kadagiti linteg ken pagalagadan.
Sigun kenni City Permits and Licensing Officer Allan Abayao, kaaduan kadagitoy ket apartments ken transient houses.
Kinunana a naipaayan dagitoy ti ‘notice of violations’ tapnu ikorektarda ti naaramidda a panaglabsing bayat a naipataw ti pannusa kalpasan dagiti naisayangkat nga imbestigasyon a naibasar kadagiti reklamo a naawat ti lokal a gobyerno manipud kadagiti kliyente dagiti namulta.
Karaman kadagiti reklamo kadagiti nasao nga establishimento ti saan a napintas a customer service, mishandled booking, down payment refund ken saan a panagtungpal iti health and safety protocols.
Dinakamatna a dua nga establishimento ti naireklamo iti misrepresentation wenno panagaramat ti Baguio VISITA accreditation ti dadduma nga establishimento bayat nga adda dagiti apartments ti awanan ti ‘no permit to operate’ kas transient houses.
Maipalagip nga iti pagalagadan ti siudad ket dagiti laeng accommodation establishments nga addaan ti akreditasyon manipud iti Department of Tourism ken City Tourism Operations Office ti mabalin a mangipaay ti transient services tapnu maipasigurado ti kinatalged ti salun-at dagiti kliyente ken dagiti empleyado kontra iti COVID-19.
Sigun pay kenni Abayao, agtultuloy met ti panangimbestigarda kadagiti dadduma a reklamo a naawat dagitoy mainaig iti operasyon dagiti accommodation establishments iti lokalidad.
