BAGUIO CITY – Dumanon iti 5 nga Overseas Filipino Wokers (OFWs) ti naipaayan ti ayuda babaen iti Overseas Workers Welfare Administration (OWWA) Cordillera.
Maibasar iti damag, dagiti nasao a benisyaryo ket dagiti naapektaran ti panggedan gapu iti manarimaan a giyera sadiay Ukraine.
Sigun ken OWWA CAR Overseas Workers Welfare Office IV Edgar Melchor Laigo, kaaduan kadagitoy ket seaman manipod iti daduma a lugar paturong koma sadiay Ukraine.
Kinunana a tunggal maysa ket nakaawat iti sag- 10 ,000 pesos.
Innayonna nga agtultuloy latta ti monitoring ti OWWA-CAR iti kasasaad dagiti daduma pay nga OFWs nga apektado iti gubat ti nasao a pagilian tapnu maipaayanda iti ayuda iti kanito nga agawidda iti pagilian.
Dinakamatna nga ado dagiti OFWs sadiay Russia ken mabalinda a maipaayan iti financial assistance para iti livelihood iti kanito a makaawid dagitoy
Kabayatanna, agtutuloy metlaeng dagiti dadduma a programa nga ipapaayda kadagiti OFWs kas iti OWWA CARES program para iti pandemic Response; DOLE-AKAP, Agapay, Uwi-an na Program, Tulong Puso ken dadduma pay bayat a dagiti regular a programada ket paka-ibilangan ti Disability and death benefit, Welfare Assistance Fund, Education for Development Scholarship Program ken daduma pay.
Karaman pay ti 17, 400 nga indibidwal a nagbalin a benepesyaryo ti Tulong Panghanapbuhay para sa Disadvantaged/Displaced Workers (TUPAD) iti rehiyon Cordillera kasaruno iti umuna a quarter iti agdama a tawen.
Sigun ken Department of Labor and Employment (DOLE) CAR Regional Director Nathaniel Lacambra, nasurok P94 milyon pesos iti naiwarasda kadagiti nasao a beneficiaries iti TUPAD ditoy rehiyon.
Kinunana a 200,000 nga indibidwal ti puntiryada nga agbalin a benipesyaryo iti nasao a programa iti agdama a tawen a nailatangan iti P1.2 billion a pondo.
Dinakamatna a dumanon iti 141, 700 nga indibidwal iti nagbalin a benepesyaryo iti programa idi napalabas a tawen a nakaaramatan ti nasurok P840M a pondo
Inlawlawag ni Lacambra a qualified latta nga agbalin a benipisaryo dagiti immunan a nakipaset iti programa idi napalabas a tawen ngem iti sidong ti kategorya a displaced wenno disadvantaged workers.
Inyunay-unayna a dagiti indibidwal a saan a kwalipikado nga agbalin a benepesyaryo iti programa ket dagiti brgy officials, brgy health workers, brgy tanod, ken dagiti myembro iti 4ps.
