BAGUIO CITY – Inaklon ti dadaulo ti Itogon Municipal Police Station nga agingga ita ket adda latta dagiti minero a limed nga agus-usok kadagiti pagminasan sadiay Itogon, Benguet iti baet ti nainget a panangwanawanda kadagiti pagminasan sadiay.
Inaklon ni Police Major Rommel Sawatang, hepe ti Itogon PNP ti nasao a banag kasaruno ti damag nga adda ti maysa a minero a pimmusay kabayatan ti panagtrabaho daytoy iti usok sadiay Goldfield, Poblacion, Itogon.
Sigun kenkuana, maatap a natupakan ti nasao a minero bayat nga adda daytoy iti uneg ti pagminasan.
Dinakamatna a saan a taga-Itogon ti nasao a pimmusay ngem daytoy ket taga-Mountain Province.
Nupay ti panagminas ti maysa a kangrunaan a pagsupalan dagiti umili, impetteng ni Major Sawatang a nasken latta nga agtungpal dagitoy iti pammilin seknan iti saanda pay a panagminas tapno malikliklan ti aniaman a dakes a pasamak.
Kabayatanna, agtultuloy ti panangiparikep ti municipal task force kontra iti illegal mining babaen iti panangsementoda kadagiti abot wenno sumrekan dagiti sumagmamano a pagminasan sadiay Itogon.
Dinakamat ni Major Sawatang a partikular a pagsemsemento-anda ket kadagiti usok sadiay Acupan, Virac.
Innayonna a kanayon ti panangbalakada kadagiti umili mainaig iti stoppgae order ti panagminas sadiay.
Sigun pay kenkuana, puntiryada metlaeng a sementuen dagiti entrance dagiti pagminasan iti paset ti Antamok ken Firstgate, Ucab gaputa adda paylaeng dagiti natangken ti uloda a sumsumrek kadagiti pagminasan kadagitoy. (-with Bombo Florence Paytocan)
