Naawaten ti Israel ti listaan ti uppat a babbai a balud a wayawayaan ti Hamas iti maikadua a gundaway a paset ti ceasefire deal a napagnunumuan ita a bulan.
Sigun iti opisina ti Israeli Prime Minister, ti listaan ket naawatda babaen kadagiti “mediators” wenno manangibabaet, ken kinuna ti Israel nga ipaayda ti sungbatda iti kabiitan a panwen.
Makumpirmar paylaeng iti publiko dagiti nagan iti listaan nga impaay ti Hamas.
Itay laeng nabiit, kinuna ti Hamas a panggepda a wayawayaan ti uppat a babbai a soldado ti Israel, bayat a ti maysa a babai a kawtibo ti Israel ket manamnama a mawayawayaan.
Ti pannakawayawaya ti maikadua a grupo dagiti Israeli hostages ken Palestinian prisoners ket paset ti umuna aceasefire agreement a manamnama nga agpaut iti lima pay a lawas.
Iti sidong dagiti kondision, 26 pay nga Israeli hostage ken ginasgasut a balud a Palestinian ti rumbeng a mawayawayaan it
Ti Hamas ken dagiti kaalyadona ket addaan pay laeng iti 91 a tattao a naala manipud Israel idi Oktubre 7, 2023.
Adda met tallo a kanayonan a hostage a natiliw manipud idi 2014 nga adda pay laeng idiay Gaza.
Iti pakabuklan, 251 a tattao ti naala manipud Israel idi Oktubre 7, 2023.
Iti sidong dagiti kondision ti deal, umatras dagiti suldado ti Israel manipud iti sumagmamano a paset ti Gaza ken mapaadu ti humanitarian aid nga agturong idiay Gaza.
