Pinirmaanen ni Baguio City Mayor Benjamin Magalong ti resolusion a mangsupsuporta ti panggep a pannakaibangon iti baro a presidential museum iti aglawlaw ti “The Mansion”.
Ti nangisurat ti Resolution No. 266, series of 2024 ket ni Councilor Vladimir Cayabas nu sadinno, nakalanad a ni First Lady Liza A. Marcos ti nangipalgak idi napalabas a bulan dagiti panggep para iti proyekto.
Immunan a kinuna ti First Lady babaen iti maysa nga interview a nasayaat ti nasao a pasdek wenno “pagpasyaran” nu sadinno, kayatda a ma-“duplicate” tapno amin a turista nga agbisita iti Summer Capital ket makastrek nga awanan iti bayad.
Ti baro a “presidential museum” ket agserbi kas pangidulinan ti pannakaamo,mangipaay ti naan-anay nga impormasion kadagiti agbisbisita ken manglawlawag kadagiti indibidual maipapan iti turay ti tunggal presidente ken dagiti gapuanan a nagun-od bayat ti panagturayda.
Nakalanad iti resolusion a ti “The Mansion” ket agtaktakder kas maysa a nadayaw a baluarte ti pagtaengan ti presidente ken agserbserbi kas saksi iti aramid ti gobierno manipod kadagiti napalabas a panawen agingga iti agdama.
Agserbi pay ti nasao a pasdek kas “testament” ti Baguio City iti kontribusionda iti panagpasayaat ti Pilipinas iti ekonomiya, kultura, politikal ken “socia fabric”.
Ti museo ket maikari a saan laeng a mapalawa ti panangallukoy tapno ad-adda a sumayaat ti imahe ti siudad ti Baguio nu diket mangitag-ay pay iti “historical consciousness”, iti lokal man wenno intero a lubong.
