Impanamnama ti Baguio City Government a nakasagana dagitoy iti posible nga epekto nga ipaay ti bagyo a Marce nu tumama iti siudad.
Impatalged daytoy ni Mayor Benjamin Magalong nu sadino naka alerto itan dagiti kameng ti City Disaster Risk Reduction and Management Office tapno makaresponde a dagus nu adda dagiti agkasapulan iti tulong.
Sigun pay iti mayor, nupay saan a makapasar ti nakaro a tudo ken angin ti suidad ket binalakadanna dagiti agpangpanggep a sumag-at iti suidad ti Baguio nga agannad ken dumalyasat iti Marcos Highway, Naguilian Road ken dadduma pay a rota agsipud ta saan pay a mapalubusan ti pannaka-aramat nga usto ti Kennon road.
Nabalakadan metten dagiti barangay officials nga agbalin dagitoy a proactive babaen iti panag activate kadagiti Barangay Disaster Risk Reduction and Management Office tapno mabantayan dagiti masakupan da a luglugar.
Innayon pay ni Magalong nga awan ti impaulog na a pammilin para iti pannakasuspendir ti koleksyon ti basura agsipud ta maibasar iti forecast ket awan ti mapasaran a napigsa a tudo.
Iti agdama ket maituloy ti nainget a monitoring ken panagbantay kadagiti lugar a makapaspasar ti nakaro a panaglayos partikular idiay City Camp Lagoon nu sadino ket nabilin ti City Engineering Office ken Barangay GEFA ti regular a monitoring iti lebel ti danum nu agrugi ti tudo.//Bombo Jordan Tablac
