Namnamaen ni Darryl Kim Longid,dadaulo ti Public Order and Safety Division(POSD) a mangbukel ti city government ti long term solution para kadagiti mendicants wenno agpalpalama ken dagiti addaan ti problema iti mentalidad nga agwalang-walang iti Baguio City.
Kagiddan dayta ti agtultuloy a panangreskyu ti nasao nga opisina kadagitoy nu sadino, iturturongda sadiay City Social Welfare and Development Office.
Imbinglay ni Longid nga am-ammoen ken iprosproseso ti opisinada dagiti pakabigbigan dagiti nasao nga indibidwal ken maitultulod dagitoy kadagiti pagtaenganda.
Nupay kasta, maysa a parikut ti panagsubli manen dagitoy nga agwalang-walang kalpasan ti sumagmamano nga aldaw a panakaisubli dagitoy iti pampamilyada.
Malaksid iti dayta, saan met rumbeng nga ikulong dagitoy rason a masapol ti naan-anay a solusyon.
Iti sabali a bangir, impeksa ti nasao nga opisyal a malidlidayan daytoy gapu ta adda dagiti gundaway a maobserbaran ti saan a panagregget dagiti kapamilya dagiti agsagsagaba ti mental disability a tulungan dagitoy.
Gapu iti dayta, impaganetget ti opisyal a dakkel ti maitulong ti bukod a pamilya dagiti agsagsagaba iti nasao a disabilidad para iti long term healing dagitoy tapno saandan nga agwalang-walang.//Bombo Jez Lapizar
