BAGUIO CITY – Natiliw ti maysa a babai a suspek ti love scam babaen iti nagtipon a pwersa dagiti otoridad nga indauluan ti Regional Anti-Cybercrime Unit Cordillera (RACU COR).
Nabigbig daytoy a ni RACEL GONZALVES GUNO, 43-anyos ken residente ti Sangandaan, Caloocan City.
Natiliw daytoy iti maysa a condo sadiay Moonwalk, Parañaque City idi kalman babaen iti panangiserbi dagiti otoridad iti warrant of arrest daytoy gapu iti kaso a panaglabsing iti Article 315 ti Revised Penal Code as ammended in relation to RA 10175 wenno Cybercrime Prevention Act of 2012.
Sigun kenni PMaj. Annie Carmel Comising, dadaulo ti Digital Forensic Section ti RACU COR, nangrugi ti komunikasyon ti biktima ken ti suspek idi pay September 2019.
Naamuan nga agbirbirik ti biktima iti agbalin a pagayamna iti Facebook agingga a nakitana ti profile picture ti maysa nga US Navy a dagusna met nga in-add ken naaddaan dagitoy ti komunikasyon.
Kalpasan ti sumagmamano a bulan ket naaddaan dagitoy ti relasyon agingga a naala ti suspek ti talek ti biktima.
Nagdawat ti suspek iti P40,000 kasukat ti imbagana a package manipud Amerika ngem awan ti simmangpet ken naawat ti biktima a package.
Kalpasan manen ti sumagmamano a bulan ket nagdawat manen ti suspek iti dumanon P40,000 tapnu igatangda iti aramatenda nga agkallaysa.
Nangipatulod manen ti biktima iti nasao a gatad ngem awan ti simmangpet ken idi i-contact-na ti suspek ket nadlawna laengen nga in-block daytoy ti suspek iti social media.
Gapu iti daytoy, dagus a nagkamang ti biktima kadagiti otoridad a nangimbestigar iti bank account number ti suspek sadiay Parañaque.
Ditoy a naduktalan ti nagan ti suspek a nagresulta iti panakaipila ti kaso kontra kenkuana agingga iti panakatiliwna.
Nupay kasta, nakapiyansan ti suspek iti P30,000 ngem agtultuloy ti imbestigasyon dagiti otoridad no adda pay ti dadduma a nabiktima daytoy. (-report ni Bombo Janice Juanito)
