Inkeddeng ti maysa a driver manipod Betag, La trinidad, Benguet iti mangipila iti kaso kontra iti maysa nga indibidwal gapu iti maatap a carnapping.
Maibasar iti imbestigasyon, nagturong ti biktima iti maysa a bar idiay Swamp,Puguis, La Trinidad, Benguet idi January 3, 2025 ken naginom iti nasanger nga arak agingga a nakaturog.
Idi nakariing daytoy, mapukpukawen ti susi ti luganna a nailadawan a maysa nga Ace Van a nakarehistro iti nagan iti asawana.
Kasaruno dayta, saan metlaeng a nakita ti biktima ti luganna iti disso a nangiparadaanna iti daytoy.
Iti malem iti kapada metlaeng nga aldaw, nakaawat ti biktima iti impormasyon seknan iti panangisubli iti maysa nga indibidwal iti luganna iti kapada a disso a nangiparadaanna.
Nupay kasta, depensa met ti nangisubli iti lugan,naibaon laeng daytoy a mangisubli iti lugan ken saanna nga ammo nga inlibas laeng ti maatap a suspect ti nasao a lugan nga impaisublina iti nasao a lugar.
Innayon pay daytoy a ti lugan ket inaramat ti maatap a carnapper a pangreskyu kadakuada idiay Marcos Highway gapu ta naperdian ti truck nga ar-aramatenda.
Agparparang nga inaramat ti suspect ken ti nangisubli iti lugan ti nasao nga Ace Van a nangitransport iti nadadael a paset iti truck iti sentro iti siudad tapno maipasimpa.
Kasaruno dayta,nadiskubre ti biktima a nadadael ti pilid ti lugan daytoy, dandanin maibus ti krudona, ken mapukpukaw metaleng ti eyeglassesna nga addaan iti balor a P500.
Immunan a napagtulagan ti biktima ken ti suspek a pagtungtungan wenno aregluen ti nasao a kaso ngem saan nga inkan-kano daytoy iti suspect a nangiduron met iti biktima a mangituloy iti panagnipilana iti kaso kontra iti maatap a suspect.
Iti agdama, maiprosproseson dagiti kaskenan a dokumento ken maur-uray laengen iti warrant of arrest nga ipaiyulog iti maseknan a korte.//Bombo Noveh Organo
