BAGUIO CITY – Pinaglibakan ti COMELEC-Kalinga ti damag a dua a munisipyo sadiay Kalinga ti nairaman wenno naklasipikar iti Red Category iti election ‘hotspots’ iti masungad a May 2022 National and Local Elections.
Iti panakiuman ti Bombo Radyo Baguio kenni Kalinga Acting Provincial Election Supervisor Atty. Elenita Julia Tabangin-Capuyan, kinunana a saan a naklasipikar iti Red Category ti Balbalan ken Pinukpuk.
Dinakamatna a ti laeng agbantay kadagiti pagbotosan kadagiti nasao a munisipyo ket dagiti soldado imbes a dagiti pulis.
Inlawlawagna nga adda laeng ti agdinamag ngem saan met a nakumpirmar a kaadda dagiti rebelde.
Nupay kasta, impettengna nga iti kaudian a command conference ti COMELEC-Kalinga iti pulisya ken militar ket nakedngan nga awan ti namnamaenda nga agbalin a pangta manipud iti rebelde a grupo.
Innayonna nga awan ti nasken a pagbutngan dagiti umili sadiay ken awan ti mapasamak a panag-agaw kadagiti balota wenno kadagiti vote counting machines.
Inaklon pay ni Atty. Capuyan a saanda nga ammo ti ayan ti pudpudno a pangta nupay iti agdama ket awan ti basaran iti panakaipasidong iti Red Category ti aniaman a lugar sadiay Kalinga.
Sigun kenkuana, adda ti nakasagana a pwersa ti militar ken pulisya a mangnayon iti pwersa ti tropa ti gobyerno a mangiwanwan iti Kalinga para iti nakappia ken naannayas nga eleksion.
Impasigurado pay ti Kalinga Police Provincial Office nga agarup dua a pulis ti agbantay iti tunggal pagbotosan sadiay.
Kabayatana, makumikom ita ti COMELEC-Kalinga iti agtultuloy a panagsaganada para iti masungad a 2022 National and Local Elections.
Iti panakiuman ti Bombo Radyo Baguio, dinakamat ni Kalinga Acting Provincial Election Supervisor Atty. Elenita Julia Tabangin-Capuyan a linawas nga adda ti seminar ken panagsanay dagitoy.
Dinakamatna nga iti sumaruno a lawas ket maipasidongen iti panagsanay dagiti DepEd Supervising Official (DESO) Technical Support Staff ken inton Marso ket ti panagsanay met dagiti mannursuro nga agserbi kas electoral board.
Innayonna a maigidgiddan met ti panangisayangkatda ti information dissmination mainaig iti pagalagadan ti panagkampanya dagiti kandidato sadiay.
Sigun pay kenni Atty. Capuyan, puntirya ti COMELEC-Kalinga a mangisayangkat ti covenant signing kadagiti local candidates ti probinsia iti maudi a lawas ti Pebrero.
Maibasar iti kaudian a datus, idi November 2021 ket dumanon iti nasurok 154,400 ti rehistrado a botante ti Kalinga.
Iti met panakiuman ti Bombo Radyo Baguio, kinuna ni Atty. John Paul Martin, Deputy Spokesperson ti COMELEC-Cordillera nga awan paylaeng ti maibilang kas election watchlist area iti Cordillera para iti masungad nga eleksion.
Dinakamatna nga awan pailaeng ti pormal a lugar iti rehion a maideklara kas areas of concern.
Inlawlawagna nga awan ti naiuman kadakuada nga insidente wenno krimen nga adda pakainaiganna iti eleksion sipud nangrugi ti election period.
Nupay kasta, impettengna a posible nga adda ti maideklara a lugar iti Cordillera kas hotspot no mangrugin ti panagkakampanya dagiti local candidate inton Marso 25.
Dinakamat ni Martin nga idi 2016 ken 2019 ket naikonsidera kas red alert ti Tabuk City, Kalinga ken maysa pay a lugar iti Abra gaputa nakailistada ti insidente nga adda pakainaiganna iti eleksion.
Iti baet daytoy, impaganetgetna a saan a maikonsidera dagiti nakadamat a lugar kas areas of concern iti agdama gaputa awan pay ti naawatda a report seknan iti political rivalry.
Impanamnama met ni Martin a nakasaganan ti pulisya ken ti militar iti umadanin a panagkakampanya dagiti local candidate tapno mamintinar ti green alert nga estado dagiti lugar iti Cordillera.
Maipalagip a no maipasidong ti maysa a lugar iti red alert ket nainget a bantayan dagiti otoridad ti aktibidades dagiti kandidato tapno malapdan ti nadara nga eleksion.
