BAGUIO CITY – Agsagsaganan ti Commission on Elections – Baguio para iti maikadua nga Election Registration Board (ERB) hearing inton sumaruno a lawas.
Iti interview ti Bombo Radyo kenni Atty. John Paul Martin, Election Officer ti Commission on Elections – Baguio, mangrugi daytoy inton Hunipo disi sais, iti agdama a tawen.
Panggep ti Election Registration Board hearing a masukimat iti amin nga aplikasion nu maaprobaran wenno ma-“disapproved” gapu ta saan nga otomatiko a maaprobaran amin nga aplikasion para iti panagrehistro ken dadduma pay nga aplikasion.
Daytoy nga hearing ket mandato ti Republic Act 8189 a madengngeg dagiti aplikasyon ti panagrehistro iti tunggal quarter ti tunggal tawen para iti panawen ti panagrehistro.
Maibasar iti datos, dumanon iti innem a ribo uppat a gasut ken walo pulo ket uppat (6,484) ti dumalan iti Election Registration Board hearing, sigun paylaeng kenni Atty. Martin.
Nangatngato daytoy nu idilig iti napalabas a bulan nu sadinno dumanon laeng iti 3,306 ti nagparehistro para iti Election Registration Board (ERB) hearing.
Kabayatanna, agtultuloy latta a maipatpatungpal ti offsite registration kadagiti nagduduma a barangay iti siudad ti Baguio kas iti Asin Road, iti nagduduma a dadakkel a pagadalan kas ti Saint Luois University, University of the Cordilleras, Baguio City National High School ken iti kadaklan a mall ditoy siudad.
Impakaamo pay ni Atty. Martin a matuloy ti special registration para kadagiti kadete iti Philippine Military Academy.
