BAGUIO CITY – Nabigbigen ti maikapat iti lima kadagiti maatap a hijackers a napapatay dagiti pulis sadiay Tuba, Benguet kalpasan a nagresulta iti engkwentro ti hot pursuit operation kadagitoy idi parbangon ti June 30, 2021.
Nabigbig ti maikapat a suspek a ni MARK IAN TOLABUT GONZALES, 38-anyos, awanan trabaho, residente ng San Fernando, Pampanga, no sadino, daytoy ti bangkay a nakasuot ti nalabaga a t-shirt, gray a short pant ken nangisit nga slippers a nakapakleb iti kalsada iti baba ti SUV.
Immunan a naala iti abayna ti maysa a caliber .45 a naglaon ti maysa a magazine ken uppat a bala bayat a naala iti bulsa ti short pant-na ti maysa nga NBI ID card ken maysa a nangisit a holster.
Iti report ti pulisya, mismo a ti kabsat ken dua a menor de edad nga anak ni Gonzales ti nangbigbig iti daytoy.
Naamuan iti pamilya a naibalud ni Gonzales gapu iti panaglabsingna iti Comprehensive Dangerous Drugs Act of 2002 ken karuruar laeng daytoy iti pagbaludan idi Mayo ti agdama a tawen.
Kinumpirmar met dagiti annak ni Gonzales a ti rupana ti adda iti naala nga NBI ID card ngem naiduma ti nagan a naikabil iti daytoy.
Naamuan pay ti pamilya a makalawasen a saan a nagaw-awid ni Gonzales iti boarding house daytoy sakbay ti insidente.
Maipa-cremate ti bangkay ni Gonzales sakbay a maiyawid iti pagtaenganda sadiay San Fernando, Pampanga.
Immuna metten a nabigbig dagiti tallo pay a suspek a da DAVID DASSALA RAPAL JR., 40-anyos, residente ti San Fernando, Pampanga; RYAN AMURAO PANGILINAN, 41-anyos, truck driver, residente ti Mexico, Pampanga ken ni RELLY AMURAO CASTILLO, 43-anyos, construction worker, residente ti Arayat, Pampanga.
Maipalagip pay a napasamak ti panag-hijack dagiti suspek iti maysa a wing van truck sadiay La Trinidad, Benguet bayaat a napasamak ti engkwentro sadiay Tuba, Benguet idi pinalpaltogan dagiti suspek dagiti pulis a mangkamkamat kadagitoy a nagresulta iti engkwentro ken iti panaka-neutralize dagitoy.
