Nirambakan ti pagilian a Pilipinas ti maikasangagasut nga anibersaryo daytoy a makipaspaset iti Paris Olympics ita a tawen.
Iti opening ceremony ti 2024 Paris Olympics, sipapanakel dagiti dua pulo ket dua nga atleta a mangirepresentar iti pagilian a Pilipinas iti nasao a torneo para kadagiti nagduduma a kategorya kas iti athletics, boxing, fencing, golf, gymnastics, judo, rowing, swimming ken weightlifting.
Iti nasao a parada, kawes dagiti atleta ti Sinag a barong nga indisenyo ni Francis Libiran a mangipakpakita iti kultura, kinabaknang, ken kinapintas ti pagilian a Pilipinas.
Para ita a tawen, naisangsangayan ti nakaangayan ti opening ceremony ti Paris Olympics agsipud ta daytoy ket saan a napasamak iti stadium nu diket iti Seine river nu sadino naglugan dagiti atleta manipud kadagiti nagduduma a pagilian iti barko wenno cruise ken ditoy a linabasanda dagiti historic Paris landmarks a pakairamanan ti Notre-Dame de Paris cathedral ken Louvre.
Saan met a nagbalin a lapped ti saan a nasayaat a paniempo wenno ti panagtudtudona tapno maitantan ti opening ceremony rason a dagiti dimmar-ay a nagbuya iti daytoy ket nagusarda iti payong ken kapote kasta met tudo kaway dagiti atleta bayat iggemda ti bandera dagitoy.
Kabayatanna, ni Lady Gaga ti nagbalin a pop superstar a nagperform iti opening ceremony ti 2024 Paris Olympics.
Dimmar-ay met dagiti nagduduma a personalidad iti daytoy kas kenni National Basketball Association Superstar LeBron James.
Para iti opening ceremony, awan ti nakaskediul nga ay-ayam a maangay agsipud ta nangrugi daytoy iti agarup ala una ti malem iti oras ti Francia.//M
