BAGUIO CITY – Kontrolado ita ti dakkel a forest fire a nangruma iti nalawa a paset dagiti bantay iti tallo a barangay sadiay Kabayan, Benguet.
Iti interview ti Bombo Radyo kenni Senior Fire Officer 4 (SFO4) Hilario Caniedo, OIC ti Kabayan Municipal Fire Station, kinunana nga agtultuloy met ti panangimbestigarda iti nagtaudan ti nasao nga uram.
Maipalagip a nangrugi ti uram idi February 11 iti bantay sadiay Barangay Adaoay ken kimmayamkam daytoy iti forested area ti Barangay Anchukey ken Barangay Kabayan Barrio.
Kinuna ni SFO4 Caniedo a na-confine ita iti maymaysa a disso ti uram bayat a bambantayanda ti sakaanan ti bantay nga ayan ti nasao a disso gaputa saanda a makaasideg iti uram gapu iti kangato ti bantay.
Dinakamatna nga iti pattapattada ket agarup nasurok iti 150 nga ektarya dagiti bantay sadiay ti nauram gapu iti kapartak ti panagkayamkam ti apoy.
Inaklonna metlaeng a kurang ti bilang dagiti bombero ken kagawaanda iti panagsebseb iti nasao nga uram.
Naamuan a nagbalin pay a manual ti panagsebseb dagiti bombero iti nasao a forest fire.
Nagresulta ti nasao a forest fire iti panakadadael dagiti pagmulaan ken agricultural projects dagiti umili pakairamanan ti maysa a daan a balay nga agserserbi a paginanaan dagiti mannalon sadiay.
