Nagpakdaar ti Malakanyang kontra kadagiti Pilipino a mangiwarwaras iti palso a damag a mangikagkagumaan a mangsabotahe ti programa ti agdama nga administrasion, a mangikagumaan a mangilako ti bagas iti P20 tunggal kilo.
Iti maysa a press briefing iti Palasio, indatag ni Presidential Communications Office Undersecretary Claire Castro ti maysa vlog a mangibagbaga a ti bagas a mailaklako iti P20 tunggal kilo ket saan a bagas, no di ket “feeds” para kadagiti ayup.
Ti statement ni Castro ket imbagana sumagmamano nga aldaw kalpasan nga impagarup ni Vice President Sara Duterte nga “false hopes” laeng ti ipapaay ti presidente kadagiti umili gaputa patienna a ti bagas a mailako ket saan a maibagay iti kanen ti tao nu diket para laeng kadagiti ayup.
Sigun kenni Castro, agannada dagiti Pilipino kadagiti fake news peddlers gaputa pirpirdienda ti proyekto, ti presidente, ken ti namnama ti tunggal Pilipino.
Innayonna a saan pay a nairuar ti bagas a mailako iti P20 tunggal kilo.
Idi laeng Miyerkules, impablaak ni Agriculture Secretary Francisco Tiu Laurel Jr. a ti bagas ket mailako iti P20 tunggal kilo idiay Visayas.
Kinunana a binilin daytoy ni President Ferdinand “Bongbong” Marcos Jr. a maiyemplementar ti nasao a programa agingga inton 2028.
