BAGUIO CITY- Nangipatungpal dagiti mannalon ti caravan, public tarpaulin wenno campaign signing sadiay La Trinidad Trading Post itay agsapa.
Sigun kenni Agot Balanoy, panakabagi ti League of Associations iti La Trinidad Vegetable Trading Areas, 250 a mannalon ti nakipaset iti nasao nga aktibidad kadwada dagiti nagduduma nga stakeholders.
Impeksa dagiti maseknan ti panangkontrada iti agtultuloy nga smuggling ti nateng sadiay Metro Manila a nakaro a mang-ap-apektar iti industriya ti nateng iti lokalidad.
Naipatungpal ti caravan iti sadiay Pico, Puguis, Buyagan ken iti Halsema Highway no sadino naimuntar kadagiti luganda ti karatula a nasuratan iti ” SAVE US, FARMERS, STOP SMUGGLING”; “SAVE BENGUET, STOP SMUGGLING”; “YES TO FARMERS, NO TO SMUGGLING” ken “LOVE BENGUET CARROTS, NO TO CHINA CARROTS”.
Mangnamnama dagiti mannalon a babaen iti nasao nga aktibidad ket mangngegan ken ipangag ti gobierno ti pakaseknan dagitoy.
Agtaltalinaed nga arungaing dagiti mannalon ti nangato ti presio dagiti farm inputs ken ti nababa a presio dagiti highland vegetables.
Kadawyan nga agresulta daytoy iti panakaibelleng dagiti nateng gaputta saan a magatang iti kaawan dagiti buyers.
