Pagsagsaganaen ti Department of Agriculture (DA) dagiti mannalon ken mangngalap para iti posible nga epekto ti bayo nga Uwan iti pagilian.
Binalakadan pay ti DA ken Disaster Risk Reduction and Management Office dagiti mannalon nga apitenda dagiti mulada a mabalin a maapit sakbay a marikna ti epekto ti bagyo.
Kidkiddawen metlaeng ti DA nga idulin dagiti planting materials, ken dadduma pay a suplay ti agrikultura kadagiti nataltalged a lugar a saan a madanon ti layus.
Karamanen ditoy dagiti taraken, taraon, ken agas.
Ipadaldalus metlaeng ti nasao nga ahensia dagiti irrigation canal tapno malapdan ti layus ken naparpartak ti panagayus ti danum.
Kabayatanna, imbilin ti DA kadagiti mangalap nga iturongda dagiti bangka iti natalged a lugar.
Maibalbalakad pay a sapaenda nga agapit kadagiti tarakenda nga ikan ken dadduma pay a produkto ti aquaculture, nangruna no masansan a malayus ti lugar dagitoy.
Impaganetget ti nasao nga ahensia nga agtultuloy ti panangmonitorda iti kasasaad dagiti talon, pakairamanan ti prepositioning agricultural inputs para kadagiti mannalon a mabalin a maapektaran iti umay a bagyo.
