BAGUIO CITY–Nainget a pagsagsaganaan ti maysa a pribado a pagagasan ditoy Baguio City ti vaccination roll-out iti kanito a sumangpeten dagiti bakuna kontra iti COVID-19.
Sigun ken Dr. Paul Quitiquit, Medical Director ti SLU Sacred Heart, dumanonen iti 95% ti panagsagana dagitoy para iti nasao a banag.
Kinununa a dagiti laengen cold chain storage ti isagsagana dagitoy gaputa saanda pay nga ammo no ania iti maipaay kadakuada a bakuna.
Malaksid iti dayta, inaklonna a saanda pay nga ammo no pagtaudan dagiti bakuna a maipaay kadakuada.
Impettengna a kasapulan nga marisot wenno masolusyunan pay ti nasao a banag tapno maibaga a nakasaganan dagitoy iti roll-out ti bakuna.
Mainaig iti dayta, kinuna ni Dr. Quitiquit a 50 manipod iti 650 a personnel ti nasao a pagagasan ti agduadua paylaeng para iti pannakipasetda iti vaccination program ti lokal a gobierno ti Baguio City.
