Nagturong iti opisina ti Bureau of Investigation (NBI) idiay Quezon City ti ‘body double’ ni sigud a Bamban, Tarlac mayor Alice Guo ita nga aldaw tapno makisarita kadagiti ahente a mangasikaso iti kaso ti naikkat nga opisial
Ti babai nga alias Cath ket simangpet iti agarup alas dos ti malem ken simrek iti opisina ni Lito Magno, NBI assistant director for investigation service.
Nakakawes ni Cath iti maris “light green” a bado, nakapantalon, glasses, face mask ken addaan ti nangisit a buok agingga iti baba ti bukotna.
Maipalagip a nakisarita ni Magno kenni Guo idiay Indonesia kalpasan ti pannakakemmegna ket impakitana kenni Guo ti ladawan iti selponna.
Idi sinaludsod ni Magno nu siasino ti adda iti ladawan, impatarus ni Guo a saan nga isuna iti adda iti ladawan.
Kinuna ni Guo nga staff-na iti adda iti ladawan.
Immunan a kinuna ti NBI a sapsapulenda ti maipagarup a “decoy” wenno kaasping ni Guo, a mapapati a nausar tapno mangriro kadagiti otoridad.
