Saan a ninamnama ti 90-anyos a lola sadiay Hubei, China nga inaldaw nga adda iti piggad ti biagna gapu iti us-usarenna a martilio, no sadino maysa gayam daytoy a granada.
Sigun kenni Lola Qin wenno pagaammo iti nagan a Grandma Qin, napidutna ti nasao a banag iti maysa nga aldaw a nagtrabaho daytoy iti talonna.
Inyawidna iti pagtaenganna ken inaramatna daytoy kas martilio, panggiling kadagiti sili ken mani iti las-ud iti baente a tawen.
Ti saanna nga ammo, maysa gayam daytoy a Chinese Type 67 a granada.
Sigun kadagiti dadduma a netizen, maysa daytoy a training grenade, isu’t gapuna a saan a pulos daytoy a bimtak bayat ti panangpukpuk ti nasao a lola.
Nupay kasta, konompirmar dagiti special unit a live grenade daytoy ken naka-expose payen ti pin na, nga iti uray inya nga oras ket posible a bumtak daytoy apaman a guyuden ni Lola Qin ti nasao a pin.
Sigun met kadagiti nasao a unit, nagasat launay ti nasao a lola ta saan a bimtak ti granada bayat ti panangpukpukna.
Tapno saan a mangitunda ti aksidente, pinabettak daytoy dagiti otoridad.
Komento met ti masya a netizen, arigna nga uray dagiti hand grenade ket addaan kadagiti prinsipio ken saanda a bumtak kadagiti naasi ti panagpuspusona a lallakay ken babbaket.
