BAGUIO CITY – Pakabuklan a pito a drug personalities ti nakemmeg ti Baguio City Police Office manipud Enero agingga ita a bulan iti agdama a tawen.
Iti interview ti Bombo Radyo kenni PMaj. Harriet Bulcio, panakangiwat ti Baguio City Police Office, pakabuklan nga uppat a pulo ket uppat a drug operations ti impatungpal dagitoy.
Sigun kenkuana, kaadwan kadagiti natiliw a personalities ket agar-aramat ti shabu nu sadino iti agdama ket agarup 23 grams ti pakabuklan a nakumpiskar kadagiti personalities iti siudad.
Maibasar metlaeng iti assessment ti Philippine Drug Enforcement Agency, kaadwan kadagiti natiliw nga indibidual iti rehiyon Cordillera ket gapu iti panagilako ken panagaramat ti shabu iti baet a mabigbigbig ti rehiyon kas kangrunaan a pagtataudan ti marijuana.
Inlawlawag ni PMaj. Bulcio a kaykayat dagiti pusher ti shabu gapu ta dakkel ti value-na nu ilakoda ken nalaka a mailemmeng dagitoy nu idilig iti marijuana.
Bayat a pilpilien dagiti user ti shabu gapu iti epekto daytoy iti bagi partikular dagiti night shift kas maibasar iti kapadasan dagiti natiliw a drug personalities.
