Impakaammo ni Baguio City Mayor Benjamin Magalong nga awan met ti nagrekkep a business establishments iti siudad ti Baguio iti baet ti mapaspasaran a krisis iti petrolyo.
Iti interview ti Bombo Radyo, kinunana nga adda laeng dagiti sumagmamano a gasoline station a naawanan iti suplay ti petrolyo.
Imbinglayna nga itay nabiit ket naaddaanda iti diyalogo iti Chamber of Commerce, Baguio-Benguet Business Club, dadduma a Department Store, ken fuel/gas owners.
Iti nasao a diyalogo, impanamnama dagiti business establishment nga awan ti pilpilienda a customer.
Impanamnama pay dagitoy a saanda a gundawayan ti mapaspasaran a krisis tapno mangipangato latta iti presyo dagiti produktoda a saan a maiparbeng.
Dinayaw met ni Mayor Magalong dagiti business establishment gapu iti kooperasyon dagitoy.
