Naiparikep ti operasyon ti maysa a bar bayat a narelieve iti pwesto dagiti tallo a police personnel iti Baguio City itay nabiit.
Kasaruno daytoy ti reklamo nga impila ti maysa a US Navy Serviceman a racial discrimination kontra iti maysa a bar iti deppaar ti Leonard Wood Road idi napan a bulan.
Imbilin ni Mayor Benjamin Magalong ti imbestigasyon kalpasan a nakadanon kenkuana ti reklamo ni US Navy officer Michelot Joseph a naparitan daytoy a sumrek iti nasao nga establishemento gapu iti langa ken nasyonalidad daytoy.
Inreklamona pay ti maatap nga iregularidad a panagtrabaho dagiti tallo a personnel ti Baguio City Police Office Station 3 a nang-iggem iti nasao a reklamo.
Sigun kenni City Permits and Licensing Officer Allan Abayao, naibilin iti nasao nga establishemento idi Oktobre 24 a liklikanda nga ag-operate kas bar, saanda nga agiserbi ti arak ken agtulnogda iti business permitda nga ag-operate-da laeng kas maysa a restaurant.
Kalpasan ti insidente, nagkiddaw met ti bar operator ti dispensar kenni Joseph gapu iti saan a patas a panangtratoda kenkuana.
Naituding met a maipasidong iti refresher seminar seknan iti 1st responders ken phraseology dagiti tallo a pulis a narelieve iti pwesto.
Nangipaulog metten ni Acting City Police Director PCol. Francis Bulwayan ti memorandum kadagiti amin a personnel ti Baguio City Police Office tapno agtulnogda iti probisyon ti Memorandum Circular 2016-002 ken ti Republic Act 6713.
Inawat met ni Joseph ti dispensar ti manager ti nasao a bar ken impeksana ti panagyamanna iti nagbalin nga aksyon ni Mayor Magalong ken ti Baguio City Police Office iti nasao a kaso.//Cara
