BAGUIO CITY – Natiliw ti tallo a lallaki, pakaIramanan ti operator ti maatap a drug den a nakaisayangkatan ti buy-bust operation sadiay Miners Side Extension, Ucab, Itogon, Benguet idi rabii.
Nabigbig dagitoy a da Benny Belwigan, 40-anyos, maysa a high value individual ken karaman iti high value target ti PDEA; Moises Wangit, 37-anyos, welder; ken ni Christian Batane, 24-anyos, laborer, bin-ig a residente ti Ucab, Itogon, Benguet.
Kabayatan ti buy-bust operation ket inlako ni Belwigan ti dua a pakete ti maatap a shabu nga agdagsen ti mapattapatta a 1.30 grams.
Nakumpiskar pay kadagitoy ti kanayonan a dua a pakete ti maatap a shabu nga agdagsen ti mapattapatta a 0.3 gram ken nagduduma a drug paraphernalia bayat a narekober iti ikot ni Belwigan ti naaramat a buy-bust money.
Naamuan a kagiddan ti naisayangkat a buy-bust operation ket naaktuwan ti manarimaan a panag-aramat dagiti suspek iti iligal a droga wenno ti panag-pot session dagitoy.
Kinuna dagiti operatiba a nabayagen nga agserserbi a drug den ti nakaisayangkatan ti operasyon kas maibasar iti impormasyon a naawat dagitoy manipud kadagiti umili sadiay.
Naituding a sumango iti kaso a panaglabsing iti Comprehensive Dangerous Drugs Act of 2002 dagiti tallo nga indibidual ken maipasidongda ti drug test ken swab test.
Naisayangkat ti balligi nga operasyon babaen iti nagtitipon a pwersa ti Provincial Drug Enforcement Unit ken Provincial Intellegence Unit ti Benguet Police Provincial Office, ti Itogon Municipal Police Station ken ti PDEA-Benguet.
