BAGUIO CITY – Pimmusay ti maysa a laborer bayat nga agpatpataming iti ospital ti siam nga indibidual kalpasan a natnag iti rangkis ti nagluganan dagitoy a van sadiay Sitio Nabjeng, Tabaan Norte, Tuba, Benguet.
Sigun kenni PMaj. James Acod, hepe ti Tuba Municipal Police Station, nagtaud ti van a nagluganan dagiti biktima sadiay Tabyong Norte, Tuba Benguet ken agturong koma daytoy sadiay Pugo, La Union para iti Market Day.
Nabigbig ti pimmusay a ni Dante Garcia, bayat a nabigbig met dagiti nadangran a da Precy Bansulay, Nilda Labot, Emily Pagnas, Ana Romero, Benita Paran, Linda Lamsis, Risa Pagnas, Jimwell Romero, Ronalyn Bansulay, ken Marvin Dictara.
Maibasar ti imbestigasyon, naawanan iti preno ti naglugananda a van ken natnag daytoy iti rangkis nga adaan kauneg a 50 metro.
Nagresponde dagiti kameng ti Tuba Municipal Disaster Risk Reduction Management Office, Bureau of Fire Protection ken dagiti maseknan nga umili.
Naiturong ti bangkay ni Garcia iti maysa a puneraria sadiay Pugo, La Union ken naiturong met dagiti biktima iti Baguio General Hospital and Medical Center.
Nakaruaren iti pagagasan ni Ronalyn Bansulay bayat nga agpapaimbag pay dagiti kakadwana
