BAGUIO CITY – Na-impound ti maysa a Montero wagon kalpasan a natiliw daytoy iti deppaar ti Marcos Highway idi malem kalman gapu iti panaggandat ti driver a mangibiahe pasalog sadiay Pangasinan kadagiti pasaheros daytoy nga awanan met ti kaseknan a travel documents.
Maibasar iti report, ti lugan ket addaan plaka nga YAA-2793 ken inmaneho ni Gale Lumaban Pecley, 30-anyos ken residente ti Aurora Hill, Baguio City.
Nakemmeg daytoy kabayatan ti anti-colorum operation nga insayangkat ti Traffic Enforcement Unit ti Baguio City Police Office ken ti Land Transportation Office-Cordillera.
Kabayatan ti inspeksion ket napaay ni Pecley a mangiparang ti balido a driver’s license ken certificate to operate as public convenience.
Naduktalan met kabayatan ti imbestigasyon a nagbayad dagiti pasaheros nga awan ti naited kadagitoy a tiket kas pammaneknek a nagbayadda.
Naduktalan pay nga iti social media nga idiadiaya ni Pecley ti transportasyon paruar ken pauneg iti siudad ti Baguio nga uray awan ti kaskenan a travel documents ti agbalin a pasahero.
Nangikabil pay ti nasao a driver iti IATF signage iti windshield ti luganna.
Gapu iti daytoy, naipaayan ni Pecley iti Temporary Operator’s Permit ken naipilaan iti kaso gapu iti colorum nga operasyon daytoy.
