Agpatpataming itan iti University of Zurich Hospital ti agtawen iti 16 a Pilipino a nakumpirmar a naapektaran iti napasamak nga uram iti maysa a bar iti ski resort idiay Switzerland.
Kinumpirmar ti ina ti biktima a ni Kean Kaizer Talingdan ti pakabigbigan daytoy iti Philippine Emabassy ken impatalgedna a banbantayan wenno imonmonitor dagiti doktor idiay ti kasasaad ti nasao nga agtutubo.
Ni Kean ket nagturong idiay Switzerland para iti short break iti holiday season ken nakidagus daytoy iti balay ti pamilya ti gayyemna.
Kadwana iti bakasyon ti tallo a gagayyem daytoy a kapadana metlaeng a nadunor gapu iti insidente.
Kabayatanna, inlawlawag met ti ama daytoy a medyo nabayag ti panakakumpirmar ti pakabigbigan dagiti naapektaran gapu iti kinaado ti nagsagrap iti severe burns.
Maipalagip a dinosdosena nga indibidwal ti pimmusay bayat nga adda ti nasurok 100 a nadangran gapu iti uram iti nasao a lugar kabayatan ti panakasarabo iti baro a tawen.
Impanamnama met ti embahada iti Pilipinas sadiay a nakasaganada a mangipaay kadagiti kaskenan a tulong kadagiti Pilipino nga agkasapulan.
