![](https://img.bomboradyo.com/baguio/2024/07/La-Trinidad-Benguet.jpg)
LA TRINIDAD, BENGUET – Dumanonen iti sangapulo ket tallo a pamilya a bukbuklen ti tallo pulo ket maysa nga indibidual idiay Puguis, La Trinidad, Benguet ti naibakwit iti Puguis Elementary School gapu iti panagreggaay ti daga nga epekto ti napigsa a panagtudo.
Iti interview ti Bombo Radyo, kinuna ni La Trinidad Mayor Romeo Salda nga adda pay ti maysa nga ubing a naitaray iti ospital kalpasan a nagaburan ti pagnanaedanda.
Dinakamat ti mayor a nasayaat metten ti kasasaad ti ubing iti agdama.
Sigun kenni Salda, maysa kadagiti nangitunda iti panaglayos ken panagreggaay idiay La Trinidad ket dagiti napullatan a drainage canal gapu kadagiti basura.
Gapu iti daytoy, umap-apela ni Mayor Salda kadagiti umili nga obserbaranda ti umno a panagbasura.
Imbalakadna pay kadagiti umili nangruna kadagiti adda iti narisgo a disso nga ag-ibakwitdan kadagiti kaatsigan a pagadalan gapu ta nailukat dagitoy kas evacuation centers.