Naduktalan ti Bombo Radyo Baguio iti panagsukimat daytoy a maysa a bus ti immuna a nakadungpar iti menor-de-edad a pimmusay sadiay Tuba, Benguet itay nabiit.
Maikontra daytoy iti immuna a nakalap ti Bombo Radyo kadagiti otoridad a maysa nga L300 van ti nakadungpar iti biktima.
Maibasar iti CCTV footage ken dokumento a nagun-odan ti news team, makita a maysa a bus ti immuna nakadungpar iti biktima ket naipuruak daytoy iti sanguanan ti L300 van bayat nga ag-over take kuma daytoy.
Impetteng ti source ti Bombo Radyo nga agkedked nga agpabigbig, nabatad a makita iti footage a naannad ti panagmaneho ti driver ti L300 iti dayta a gundaway, ken nawaya ti kalsada idi ag-overtake kuma daytoy.
Maipalagip nga iti umuna a naala ti Bombo Newsteam nga impormasyon, pimmusay ti maysa a menor-de-edad, highschool student, ken residente ti munisipyu ti Tuba, Benguet kalpasan a mapapati a dinungpar iti L300 a lugan nga imanmaneho ti kuarentay-anyos a lalaki, maysa a vendor ken residente ti Irisan, Baguio City. Nupay kasta, saan gayam a daytoy iti nakadungpar nu diket ti bus a kasaruno ti van.
Iti imbestigasion ti pulisia, pasang-at ti nasao a lugan iti siudad ti Baguio.
Dagos nga inturong met ti pulisia ken Tuba BFP iti ospital para iti pannakatamingna ti biktima ngem pimmusay latta daytoy gapu iti severe traumatic brain injury.
Napilaan ti kaso a Reckless Imprudence Resulting in Homicide ti driver nga addaanen iti nairekomendar a piansa a P30,000.
Iti kaudian a report dagiti otoridad, nawayawayaan daytoy kalpasan a nakapagpiansa iti nasao a gatad.| via Bombo NewsTeam
