BAGUIO CITY – Naipangato ti minimum wage dagiti mangmangged iti pribado a sektor ditoy rehion Cordillera kalpasan nga inaprobaran ti Regional Tripartite Wages and Productivity Board (RTWPB) ti baro a wage order para iti daytoy.
Sigun iti RTWPB, ag-epektibo ti nasao a panagngato iti innaldaw a sweldo inton November 18.
Agbalin a P350 ti daily minimum wage iti Baguio City, La Trinidad ken Tabuk City manipud iti agdama a P305 agingga P320.
Makaawat met iti P340 a daily minimum wage dagiti mangmangged iti dadduma a paset ti rehiyon manipud iti agdama a P300 agingga P315.
Nupay kasta, mailaksid dagiti baro a wage order dagiti agtatrabaho iti personal service a pakairamanan dagiti drivers, domestic workers ken dagiti agtatrabaho kadagiti rehistrado a Barangay Micro Business Enterprises gaputa sabali a linteg ti mangsaksakop kadagitoy.
Sigun kenni Department of Labor and Employment – Cordillera Regional Director Exequiel Ronnie Guzman, ti baro a minimum wage rate ket naibasar iti poverty threshold ti rehiyon.
Naituding a mangisayangkat ti departamento iti inspeksion kadagiti maseknan nga establishimiento tapnu maipasigurado a maiyem-implementar ti baro a wage order.
