Sipapanakel nga impakaamo ni Ferdinand Balanag, founder ken festival director ti Montañosa Film Festival a babaen iti panakabukel ti nasao a piyesta ket nakaaramid dagitoy iti lima pulo ket walo a local films babaen iti suporta ti lokal a gobyerno ti siudad.
Sumagmamano kadagiti local films ket nakastrek met kadagiti national ken international level a pasalip.
Para ita a tawen, daytoy ti maikalima a panakaangay ti nasao a piyesta.
Sigun kenni Balanag, dagiti sumagmamano a naipaayan iti pammadayaw ket pakairamanan ni Jonathan Jurilla, winner iti Montañosa Film Festival 2023 Narrative Film Completion kasta met iti 2024 Documentary Film Competition no sadino nakaawat daytoy ti Prestigious Palanca Award.
Malaksid kenni Jurilla, nabigbig met ni Juluis Lumiqued nga addaan iti pelikula a napaulwan ti “Wedding Dance,” maysa a film adaptation iti short story ni Amado Daguios.
Iti sabali a bangir, maangay ti International Film Festival Launch inton Marso 27 no sadino ket maipakita ditoy ti kaunaan a world premiere screening ni Riki Rhino a “Woman from Rote Island ken short film a “Wayang: Shadow of the Night” manipud iti Indonesian Embassy.
Kabayatanna, mabigbig dagiti most outstanding films and filmmakers of the year inton Marso trenta ita a tawen.//Bombo Noveh Organo
