BAGUIO CITY – Agtaltalinaed a ti Mt. Province ti kakaisuna a probinsia iti rehion Cordillera nga awanan kaso iti Delta variant.
Sigun kenni Governor Bonifacio Lacwasan Jr., resulta daytoy ti epektibo a koordinasion ti lokal a gobierno ken kadagiti umili seknan iti maipatpatungpal a paglintegan kontra iti COVID-19.
Maibasar iti kaudian a datus, nakailista ti probinsia iti 267 a kaso ti COVID19 no sadino kababaan daytoy manipod iti 7,187 a pakabuklan a kaso iti intero a rehiyon.
Dumanon iti 5,259 ti pakabuklan a kaso dagitoy iti COVID-19 nu sadinno 4,902 dagiti nakarekober ken 95 dagiti pimmusay sipod idi napalabas a tawen.
Sigun pay kenni Governor Lacwasan, naadal dagiti residente sadiay a saan nga agpakampante ken ipangrunada ti panagsalwad tapnu saanda a makaptan iti sakit kalpasan ti panagngato ti kaso ti COVID-19 iti umuna a quarter ti 2021.
Maibasar met iti record ti Mt Province Provincial Health Office, kaadoan kadagiti kaso a mailislista sadiay ket pakairamanan dagiti travelers, returning residents ken authorized persons outside residence dagiti kanayun a rumrumwar wenno sumsumrek iti probinsia.
Gapu iti daytoy, naipaulog ti pammilin a kasapulanen a mangiparang iti vaccination cards ken negatibo nga resulta ti RT-PCR test dagiti saan a residente nga agturong sadiay.
Nupay kasta, dagiti residente a pastrek sadiay ket mabalin a mangiparang laeng iti vaccination wenno ti negatibo nga RT-PRC test kadagiti checkpoints.
Nupay kabaelanda pay nga imanihar dagiti kaso dagitoy, nakasagana latta ti Temporary Treatment ken Isolation Facilities ti probinsia.
